Primavera, luogo di poesia, di profumi, di risvegli armoniosi e vitali. Napoli e la Campania, nei loro luoghi ricchi di sapiente bellezza, rinascono come in una forma tutta nuova, e con loro, anche la poesia, che sembra acquistare splendore e vitalità. Di seguito, alcune mie poesie inedite ambientate in questa meravigliosa stagione.
Jean baptiste Corot ( chiaro di luna)
Ammore a primmavera
Suspiro ‘e viole,
i’ sto dinto,
e tu staie fore,
c’arrepasse stu ciardino,
cu chist’uocchie a form’ ’e sole,
te veco, nun te veco,
st’aria ‘e primmavera fa ‘e dispiette,
te veco e nun me pare overo,
comm’ ‘o viento te dispierde,
tanto è doce stu pensiero,
ca stu verde comme ‘o mare,
è tal e quale.
‘A decisione
E ‘o sole primma ‘e trasì,
se guarda attuorno a uocchie ‘e bene,
e dice: sta Rosa ‘int’a sta casa?
Si’ è no, s’arraccumanna ‘a luna: se ne parla quanno vene.
Van Pitloo ( castel dell’ovo)
Giesummino
Nun è fronne ‘e ciardino,
sfruculea ‘o pizz’a riso,
st’addore ‘e giesummino,
è nu suspiro ‘e paraviso.
M’ ‘o sento ogne matina,
quannno vaco a faticà,
‘o saluto e m’avvicine,
pecchè me fa ‘ncantà.
Primmavera cianciosa
Primmavera cianciosa,
tiene ‘o core mi’ ‘int’ ‘e vene,
me sento ‘mpietto n’addor’ ‘e rose,
te piglie ‘o male e me lasse ‘o bene.
Tu sola primmavera me saie cunsulà,
è n’ammore senza diebbete,
tutto daie senza piglià.
F.Coppola Castaldo (pescatori a riva)
Auciello
T’aggio scritto ‘na puisia,
ma nun ‘a saccio decantà,
‘e parole so’ vestute ‘e gielusia,
pecchè te voglio eppure nun staie ccà.
Mo te manno chist’auciello,
cu ‘a puisia a te purtà,
si’ te piace, tu dincello,
iss’ ‘o ssape c’ha dda fa.
Vieneme ‘ncore auciello mie,
sulo tu può cunzulà,
stu core affranto ‘e malincunia,
ca penza sempe a chella là.
Aria ‘e primmavera
Aria fresca ‘e sera,
aria addirusa ‘e primmavera,
mo nu viento ‘e rose,
mo na brina ‘nfosa,
saglie e faie ‘ncantà,
primma vaie po’ tuorne ccà,
chi te sente nun se scorda ‘e chest’addore,
chi se ‘ncontra a primmavera, se ‘ncontra cu l’ammore.
Abbrile
Abbrile,
tiene ‘o core cchiú gentile,
guarda sta farfalla,
comme gira e comm’ abballa,
vol’addó ce sta l’addore,
‘e margherita o girasole,
guarda pure l’ape llà,
ca fa ‘o mele pe’ c’ ‘o dà,
o chi pensa ‘o ver’ammore,
cu chill’uocchie a forma ‘e core,
tu Abbrile nun ce sta che fa,
ce faie saglí ‘ncielo senza ce spustà.
