Mammema m’ha dato ‘o nomme e Dio m’ha dato ‘o core, ma Napule vita mia, sî tu ca’ m’hê dato l’ ammore
Poesie Napoletane
Canzone
Quanno vene ‘a stagione,
e fresca è ‘a nuttata,
me saglie ‘mpietto na canzone,
c’ addiventa serenata.
Eppure canta chistu core,
chiuso ancora ‘int’a na gabbia,
chi dice è canto d’ ammore,
chi dice ch’ è rabbia,
io v’ ‘o giuro nun ‘o saccio,
chello che vô significà,
saccio sulo ca’ ‘int’ a sti braccia,
tenga ‘a smania ‘e cantà,
sarrà pecché ‘a stagione m’arricorda ‘e na persona,
sarrà pecché stu core,
assumiglia a na canzone
‘Nzieme a te
Astritte astritte restamme abbracciate,
nun pensamme a dimane è già passato.
N’ora ancora e pó vene l’ eternità,
nun esiste ‘o tiempo sî i’ ce stongo,
sî tu staie ccà.
‘A vita è nu mumento ca’ nun sape raggiunà,
s’ha da piglià comme vene,
e nuie sapimme comm’amma fa.
L’ammore ca’ ce damme ‘o sapimme io e te,
nun pensamme a che sarrà,
nun ce serve do’ sapé,
pecché chi se vô bene nun lê ‘mporta dô dimane;
astritte astritte stamme abbracciate,
dimane è n’eternità ca’ nun è ancora arrivata.
Urgenza
Tengo n’urgenza ca’ nun saccio spiegà,
m’arrevot’ ‘a capa e nun me fa raggiunà.
‘A nuttata m’ ‘a fa janca e scura ‘a matenata,
m’accumpagna quanno esco
e s’appresenta â retirata,
ce l’ aggio itto a nu prevete ma nun ce sta che fa,
pure l’amice me risponneno: che vaie dicenno, nun ce penzà.
Po’ ce l’ aggio itt’ ‘o core giusto pô sapé,
finalmente l’ aggio capito,
chesta urgenza riguarda a te
Core ‘nnammurato
Tu me guarde e io te guarde,
amm’ancora accumincià,
po’ te tocco e tu t’avuote,
io me fermo pe’ t’aspettà.
Nun te fide e chist’ammore,
e faie ‘a ‘nzista pe’ nun ce penzà,
ma sî me siente core a core,
truove ‘a forza ‘e ce pruvà.
L’ ammore nun è cosa ca’ se pô raggiunà,
nun riesce a fa ‘o restivo,
cchiú ‘o stut’ e cchiú ‘o siente alluccà.
Ma io te guardo e tu me guarde,
stamme ancora ‘mbarazzate,
chi c’ ‘o dice a chesta bella,
core mio s’ è ‘nnammurato?
Vierno
È notte e nu viento liggiero sona ‘a ‘mmiez’ a’ via,
me pare quasi scetate ‘e sunnà,
‘ncoppa ‘e note triste ‘e sta melodia.
Vierno, e mor’ ‘o ricordo d’ ‘e feste passate,
Gennaio è na cosa strana,
tutto è fermo e tutto se move,
fermato è ‘o viento,
e l’ uocchie se fissano ‘ncopp’ a na luna bianca,
ma ‘a mana mia è stanca,
e de scrivere se rifiuta ‘e continuà,
me piglio ancora nu mumento,
mentre l’ aria all’ intrasatta se fa scura,
e quasi me sento ‘mpietto na voce ‘e parlà,
è nu ricordo ‘e gielusia ca’ s’appaura,
pó nu rummore ‘e pioggia me vene a tuzzulià,
doce è ‘o suonno ca’ sotto a sta luna,
‘e ‘int’ a’ vernata me vene a ‘ncuntrà
Luna argiente
Na luna ârgiente sorge chiano ‘ncopp’ ‘o mare,
nu viento doce canta luntanamente,
e cchiú m’appizzo, cchiú me sento nommenare.
N’aria calma se sente dint’ ‘o viculo suspirà,
mo n’onda quieta mo nu muro ‘e stelle,
ca’ p’ ‘a priezza me sento cunnulià.
Dorme ‘o mare dorme ‘o core, tutto stanotte me pare ‘e sunnà,
è nu suonno appicciato d’ammore, e io sott’ a sta luna nun me voglio scetà
‘A sumiglianza
Tu assumiglie a chelli cose,
ca’ nun riesce a spiegà,
chelli cose ca’ stanno ‘nzino,
e nun c’a faie a le scurdà.
Na cosa ca’ sî ce pienze,
ce pienze overamente,
na specie ‘e malatia,
ca’ nun t’accire e nun leva niente.
Tu sî chella parola,
‘ncopp’ ‘a ponta da lengua,
‘a pienze na vota sola,
e te fa sango,
ma da capì nun riesce ancora.
Tu sî na rosa o giesummino?
nun ‘o ssaccio ma che ‘mporta,
facc’io ‘o ciardiniere e tu faie ‘o ciardino
‘A Passione
Passione,
‘a vita ‘int’ a sta città è na canzone,
te scite ‘int’ a ‘na goccia ‘e nu café,
e pó te truove ‘nzieme all’ ate comme a te.
Napul’ è nu core senza vene,
te dà l’ amaro,
e all’ improvviso te vô bene.
Ce vó pacienza a cammenà p’ ‘a città,
pecché ‘a passione ccà è veloce,
e nun tene modo ‘e se fermà.
Te pare quasi ‘n epicentro ‘e pazzaria,
e t’addimanne sî è realtà o fantasia.
Ma ‘o core ‘e sta città nun tene ragione,
l’ allegria è ‘na scusa,
ca’ cagna ‘o male ‘int’ ‘e vierse ‘e ‘na canzone
Saluto e Poesia
Poesie Napoletane, e ringrazio i lettori e le lettrici augurando un felice anno nuovo, nella speranza che la poesia diventi anima viva nella vita di ognuno. Mi riempie il cuore scrivere testi in lingua Napoletana, è parte di una passione che mi coinvolge a 360° e mi conduce a spaziare ovunque nella poesia. Oltre i testi che avete appena letto, desidero cogliere l’occasione per presentarvi la mia ultima raccolta di poesie, una raccolta d’amore e di vita che ho curato con tutta la mia anima. Il libro è disponibile su Amazon o mediante il sito della casa editrice Eretica edizioni, consigliabile quest’ ultimo, per una sola questione di grafica. Un saluto a tutti e pace
Link del sito consigliato: Link
