Auguro ai gentili lettori e alle gentili lettrici, una meravigliosa primavera, desiderando dedicare loro queste quattro poesie Napoletane, riferite a una delle stagioni più belle in assoluto. Buona lettura 😊
È turnata
È turnata,
‘a vedite?
‘ncopp’ all’arbere s’è cuccata,
si’ appizzate ‘e recchie ‘a sentite,
tutta bella e affatata.
C’ha purtato: rose e giesummino,
cocche fravole ‘e sciardino,
e n’addore ‘e panne spase,
ca è bello quanno iesce e pure quanno trase.
C’aggia dì,
si’ ‘a primmavera me fa nnammurato,
è na passione ca nun pô maie ferní,
me pare nu suonno si’ pure sto scetato.
Cara me si’
Cara me si’,
distesa ‘e mare verde,
quanta emozioni me faie vení,
a te vedé accussì bella i’ me perdo.
Me sceto e nu canto addiruso me saluta,
pô nu viento ‘e sciardino m’accarezza,
intanto na meza jurnata se n’è iuta,
‘ncantato e mbriaco ‘e priezza.
Tuornarraie ce spero l’anno nuovo,
sempe bella oi be’ e puntuale assaie,
tanto ‘o ssaie, a me ccà me truove,
nun fa ‘a nsista, nun tardà, nun sia maie.
Abbrile
Abbrile,
nun è campagna,
è na muntagna ‘e culore,
na sciusciata ‘e sciore;
e i’ m’he ncanto,
‘ncoppa l’evera bagnata,
â mmirà sta iurnata,
ca felice me fa.
Abbrile,
e Napule se culora,
tutta quanta se fa pittà,
pure ‘o mare si’ ‘o vide te cunzola,
pure ll’aria si’ ‘a siente respirà
Luna
Luna i’ a te, te saccio,
quanti vote si’ stata ‘int’a sti braccia,
quanti parole aggio scritto pe’ te.
Chist’addore ca sento quanno è sera,
guardannote me fa susprirà,
ogni vota quann’ è primmavera,
i’ ‘e te me torno a ‘nnammurà.
‘O ssaie ca pe’ me si’ ‘a cchiú bella,
t’ ‘o giuro nun te pozzo ‘mbriuglià,
sola sola o accumpagnata ‘a na stella,
me faie felice e te torno âbbraccià
