Le quattro stagioni della poesia Napoletana

In questo nuovo articolo della rubrica: La rinascita della poesia Napoletana, desidero offrire ai gentili lettori e gentili lettrici, una breve raccolta di poesie Napoletane dedicate alle varie stagioni dell’anno. Vi auguro una buona lettura, e sempre Viva la poesia Napoletana!

Juorno d’autunno

Ivan Tudisco

‘O tiempo s’è cagnato,

ll’aria è nu poco stantia,

‘o sentiero è ancora bagnato,

e me saglie ‘mpietto nu poco ‘e nustalgia.

A me piace st’addore d’evera bagnata,

‘e foglie ca se coccano ‘ncopp’’e strade,

l’atmosfera ca mò pare opaca e mò allummata,

‘a terra umida ‘ncoppa ‘e scale.

Autunno de tiempe ca nun ce stanno cchiù,

eppure chiove e iesce ‘o sole,

comme me te siente scuonceco pure tu,

volano canzone ‘ncopp’ ‘e parole,

e si’ t’annammure mo, nun te lasse cchiù.

Autunno
di Libero Bovio – De Curtis


FORSE E’ LL’AUTUNNO

CA MME MANTENE

‘STA MALINCUNIA

CHIOVE ‘A ZEFFUNNO

NINETTA MIA..

E’ UTTOMBRE QUASE..

VIERNO MME PARE

JURNATE FREDDE

NUTTATE AMARE..

SEMPE ASPETTANNO

CA NA PAROLA

UNA.. UNA SOLA..

MME VENESSE A TE..

MME VENESSE A TE

E TU CHE FAJE

STAJE ALLERA

O MALINCONICA

‘E STI JUORNE

MME PIENZE MAJE

TUORNE O NUN TUORNE

E SI FAJE BBUONO

STATTE LUNTANA..

TANTO E’ PASSATA

N’ANNATA SANA

CA NUN MM’E’ SCRITTO

CCHIU’ NA PAROLA..

UNA.. UNA SOLA..

GIA SI’ SEMPE TU..

GIA SI’ SEMPE TU

CA NUN MM’E’ SCRITTO

CCHIU’ NA PAROLA

UNA.. UNA SOLA..

GIA SI’ SEMPE TU..

GIA SI’ SEMPE TU

GIA SI’ SEMPE TU..

GIA SI’ SEMPE TU.

TAMMURRIATA ‘E VIERNO

Bruno Zapparrata

Albere annure e fronne sparze nterra
pe cummiglia’ cu na cuperta d’oro
tutt”e suspire ‘e vierno…
pe cummiglia’ cu na cuperta d’oro
tutt”e suspire ‘e vierno…
Na tammurriata ‘e viento nfaccia ‘e llastre,
me dice ca l’autunno se n’è ghiuto;
l’onna ngrifata sbatte forte ‘a rena,
po’ s’abbraccia ‘a scugliera…
No nun parla’ e avuotele chist’uocchie.
Io m’arricordo ‘e quanno
quanta calore dive a chistu core,
mo ca ‘e vierno e nu gelo l’arravoglia…
Cerco ‘e vede’ si ‘o blu sta sempe ncielo
e a mmare stesse ancora na Sirena…
Ma ‘o rummore d”o viento, se sente,
è cchiu forte e accummencia a siscà,
e sti llastre, tremmanno,
sferzate d”o viento,
te stanno a chiamma’,
E tu invece tra mille penziere…
luntano staie gia’…

Vierno trase

Peppino De Filippo

Po cielo aria ‘e tempesta,
sole nascosto…
nfra terra e mare
nuvole a centenara….

Cu ‘e primme fridde vène ‘a pecundría,
vierno trase…
malincunia!
Si na speranza tiene dinto core
lenta e triste se ne more!
Addio sere d’estate
e serenate
cantate pe ciardine e ‘mmiez’ê vvie.
Addio nuttate belle
ciele puntiate ‘e stelle,
si site ‘nnammurate e v’ha lassato…
Che pecundría!

Vola n’auciello spierzo, senz’ammore,
comme spierzo va chistu core.
Scorre, pe titte, ll’acqua ‘mmiez’â via…
vierno trase…
che nustalgía!
Addio carezze e vase,
addio surrise,
‘mmiezâddóre de sciure
e ‘e panne spase…
Addio sole d’estate,
addio tiempe passate…
Si site ‘nnammurate
e v’ha lassato,
che pecundría!

Po cielo aria ‘e tempesta
Oj’ bella estate addio…
more ll’ammore mio
e vierno trase!

E’ Primavera

Massenzio Caravita

‘A rugiada brilla

pe’ ccampagne,

‘a neve se scioglie

ncopp’‘e muntagne;

‘o sole vicino ‘e llastre

stà pronto pe’ trasì

ce tuzzeleja a festa…

aspetta ca vac’ arrapì,

fore ‘ o balcone

levo ‘e mmimose

e appriparo na testa

fatta tutta ‘e rose,

veco na rondine

pe’ ncielo ‘e vulà,

stà cercanno ‘o nido

ca ce llasaje cca

e dint’ ‘a ll’aria

sento ‘e cantà,

mierole e cardille

ce vonno annuncià

ca ‘a primmavera

è arrivata, stà ccà!

E nzieme a ll’aucielle

canto pur’io p’’a felicità!

Marzo

Salvatore di Giacomo

Marzo: nu poco chiove
e n’ato ppoco stracqua:
torna a chiovere, schiove,
ride ‘o sole cu ll’acqua.
Mo nu cielo celeste,
mo n’aria cupa e nera:
mo d’’o vierno ‘e tempesta,
mo n’aria ‘e primmavera.
N’ auciello freddigliuso
aspetta ch’esce ‘o sole:
ncopp’’o tturreno nfuso
suspireno ‘e vviole.
Catarì!…Che buo’ cchiù?
Ntiénneme, core mio!
Marzo, tu ‘o ssaie, si’ tu,
e st’ auciello songo io.

Era d’estate

Ivan tudisco

Era d’estate,

e m’arricordo ‘o mare,

e tu ca cumme isso tal’e quale,

m’arracquave,

e io stracquo e chist’ammore,

m’addurmevo ma pò me scetavo.

Era d’estate,

e tu cu mmico cammenave p”e strade,

e io dicevo… ma pò me fermavo,

e quanti risate si’ ce penzo,

ma era d’estate,

ogge, ogge è n’ata cosa.

‘O prufumo d’ ‘e staggione

Giuseppe Scalese

Addore ‘e sciure, arance a primmavera,

e addore ‘e viole d’ ‘a matina a’ sera,

se mmescono ‘e glicine cu ‘e mimose,

e ‘a fava fresca s’ammesca ‘mmiez’ ‘e rose.

Prufuma ‘a giuventù ‘mmiez’ a ll’ammore,

c’è n’addore ‘e cunfiette ‘mmiez’ ‘e sciure,

e stu prufumo te dà na speranza,

e na ducezza ca te leva ‘e senze.

C’è ll’addore d’ ‘o sole ‘int’ a ll’estate,

addore ‘a terra ca s’è cchiù nfucata,

tutt”a campagna sott”o solleone,

addore ‘e piant”e fiche e de mellone.

Sta stanzulella fatta p”a cuntrora,

d’arechete prufuma e pummarole,

addora ‘e acqua ‘e mare stu lenzuolo,

te ce arrevuoglio dinto e te cunzuole.

N’addore ‘e pioggia è tutto n’ata cosa,

prufuma e milugrano e d’erba ‘nfosa,

l’addore d”a vendemmia dint’ ‘o viento,

parla ‘e ll’autunno e tu ll’autunno siente.

Sape ‘e malincunia ogne piacere,

prufuma ‘e crisanteme ogne penziere,

e ‘a pioggia a gocce a gocce a tutte l’ore,

d”o cielo manna lacreme d’ammore.

E’ vierno, ‘o viento, ‘o friddo mo te porta,

l’addore e tante, tante cose morte,

‘A primmavera, l’estate e po’ l’autunno,

so’ sulo nu ricordo ‘ncopp’ ‘o munno.

Ma nu prufumo chino ‘e nustalgia,

te porta dint”o core l’allegria,

l’addore ‘e pigne e vene d”a muntagna,

e l’accumpagna ‘o suono ‘e na zampogna.

Concludo questo articolo, con una mia poesia sulla felicità. Un ringraziamento ai lettori e arrivederci al prossimo articolo.

Felicità

Ivan Tudisco

Passamm’’o tiempo a cercà ‘a felicità,

che scieme ca simme,

nun è cosa ca dice: sta ccà o sta llà,

‘a felicità ‘a tenimmo ‘a quanno nascimme.

Facimme ‘e tutto p’accumulà,

e nun c’addunammo ca ‘o tiempo struje,

‘a vera ricchezza nun se fa guardà,

pecchè overo tesoro simme nuie.